Tsi Tkaronhiá:te Niió:re Tkaniahé:sen

É:so iohserá:ke tsi náhe, Wahiakè:ron George Gilbert roió’tehkwe’, shihohrhá:re’ aontkennorehseróhetste’, tsi ó:nen rawennékeri wahèn:ron’ nahò:tenk néne taiora’nén:take’ rao’nikòn:rakon.

“Georgie, tóhsa nonwén:ton iontatia’tata’ástha kanén:iote shní:non’,” wahèn:ron’. “Tsi niionata’kará:te ne Kanón:no nen’ nè:’e ne sá:wen iontatia’tata’ástha kanén:iote.”

É:so iá:kon iah teiakoterièn:tare’ tsi niiorihowá:nen tsi nihonatié:ren’ ne Kahnawa’kehró:non tsi wahatinatón:ni’ ne naonhà:’a tkahsennowá:nen kaná:ta ne tsi niionhóntses. Ok tánon ne Kahnawà:ke nonkwá:ti, iohnó:tes tsi ní:tsi ronnè:iahre’, tánon kakarakónhson watátie’ ne iakehiahrástha néne thotí:iens ratiká:ratons tánon ne tsi niká:ien ne sha’oháha ratíhsere’.

Nòn:wa iahia’kserá:te, tohkára niiorì:wake wahatirihwaientéhrha’ne ne Tiohtia’kehró:non ne ken’ niiawénhseron’, tsi iontatena’tonnì:tha wahonterihwahténtia’te ne Sky High konwá:iats eh nón:we McGill University Library tahatihnhotón:ko’. Eh tká:ien karónnion néne David Grant Noble rorastánion’, raónha ki’ nen’ nè:’e shakoia’tarastánion’ ratirista’kehró:non ne 1970 nitiohserò:ten.

“Onkwatera’swí:ioste’ tsi wa’kheientéhrha’ne thia’tehononhontsá:ke ne ón:kwe, tánon akwé:kon tsi nihá:ti othé:nen kherihwaientehrhà’on,” Gilbert wahshakohró:ri’ ne ronatahonhsaténion’ ne tsi tkanenhrón:ni’ nonkwá:ti ne ki’ aó:wen aontahatikétsko’ ne iontatena’tonnì:tha Tiotierénhton shítken.

Ken’ nithoién:ha rarista’kehró:non Jax Robertson wahotia’tóntha’se ne Gilbert. Tiohsahrhóntion nonkwá:ti’ tahoió’ten ne 2000 nitiohserò:tens ohén:ton shonsà:rawe’ ne Kahnawà:ke. Entà:’on wahátkahwe’ áse’ kenh tahaià:ten’ne ákta ne oié:ri niiohserá:ke tsi náhe. Tehnitsá:ron wahshakotihró:ri’ ne ronatahonhsiióston’ ronatia’tarò:ron’ tsi nihotiia’tawénhseron’.

Kahnawa’kehró:non eh ratiia’tarátie’ ne tsi niká:ien  thonatkahthóhseron’ ne tsi iontatena’tonnì:tha tánon wahonathón:te’ne rononhà:ke tsi nikawennò:tens thotiwenninekèn:’en.

“É:so tsi ioiánere,” wa’è:ron’ Barbara Diabo, tsi wahonwatirihwakwénienste’ ne aktóntie ratinákere ratirista’kehró:non tsi wa’onterihwahténtia’te akó:wen teiontieronniónhkhwa, Sky Dancers, tsi tehotiia’tatokénhton’ tsi niká:ien Shontónskwen’ne thonenhé:ion’ ne 1907 nitiohserò:ten. “Í:kehre’ teiotonhontsóhon’ sénha taonterihwaré:ni’ kí:ken áse’ kenh kattó:kas tsi nonkwá:ti tsi tkentiohkowá:nen tsi tewanákere’, tsi é:so iá:kon iah othé:nen teiakoterièn:tare ne ken’ nonkwá:ti tsi niionehrákwaht tsi nitewaia’tò:ten’ aorihwà:ke.”

Nòn:wa tsakoió’te’ ne tsi iontatena’tonnì:tha orihwà:ke ne ki’ ne aktóntie ratinákere ratirista’kehró:non raoná:wen.

“Tasatkahthóhsera’ kí:ken kanenhronniánion’,” wa’è:ron’. “Ká:ts, satkáhtho, ísi’ nón:we serihwaientéhrha’n ne tsi nihatiia’tò:ten ne ratirista’kehró:non. Ontionkwe’tiióhtshera nen’ nè:’e ne ronónha.”

Kahnawa’kehró:non iakorihonnién:ni Wahéhshon Shiann Whitebean tahonwatiia’ténhawe’ ne Indigenous Oral History and Storytelling ronwatirihonnién:ni’ ahonwanatahónhsatate’ Gilbert tánon Robertson tsi enhiathró:ri’ tsi nihotiia’tawénhseron’ ne ken’ nikaio’tenhserò:ten.

“É:so tsi wakon’wéskwani’ tsi wá:tons ákte’ ná:kehte’ tsi tkateweiénstha,” wahèn:ron’ George Tucker-Pieczonka, shaià:ta raterihwaiénstha nen’ nè:’e tsi nonkwá:ti ne Whitebean tsi ronwatirihonniennì:tha. “Í:kehre’ tsi kwah tokèn:’en sénha io’nikonhró:wanht tóka’ni iorihwáskats thóha tió:konte’ ne niá:we ne waterihwahnó:ton’.”

Rotiio’tátie’ ne ronterihwaiénstha ne raoná:wen ohna’kénhkha kaio’ténhsera, tánon Whitebean wà:’enhre’ tsi karihwástha’ enhoná:ton’se nothé:nen ahonnonhtonnión:ko’ ne ronwatirihonnién:ni ne kí:ken kanenhrón:ni’.

“Wà:kehre’ é:so tsi wate’shenní:io’ ne raotirihwà:ke ne kí:ken’ ne ki’ ne aontahón:ne’ tánon ahontahónhsatate’ tsi tiakó:ien enieká:raton’ tsi niiokarò:ten ne onkwaná:ta,” wa’è:ron’, ionsaiontahsónteren ión:ton’ tsi ióskats tsi nihniweienno’tèn:ne tetsá:ron ne iatá:tis.

Tsi onthwe’nonniáhsi’ tsi wahiatá:ti’, tha’ontié:ren’ tsonnonhtonniónkwas tsi niiohtòn:ne ne ronnón:kwe tánon ne kanatakonhró:non raotirihwà:ke ne Kahnawa’kehró:non shahatiniáhese’ ne ken’ nikaio’tenhserò:ten ne ki’ ne aón:ton ia’takaié:ri’ne tsi ní:kon tahontèn:tsha.

“Í:kehre’ tha’katierénstsi’ iahà:khewe’ kí:ken, kítskote’ tánon wakatahónhsate’ tsi ní:tsi wetewatateren’háhten’ tsi ní:tsi rotikarewáhtha ne onkwasken’rhakehtáhtshera, tsi entà:’on enhati’shátsteke’ tánon thienshontahkátstate’,” wa’è:ron’. Ronwanonhà:’a sahonwehià:ra’ne, tsi thoia’tèn:’en tsi rarista’kehró:non kèn:ne. “Entà:’on átste iahón:ne’ ne onkwasken’rhakehtáhtshera tánon tsi wa’thatí:ien’ tsi ronnónhnhe’ áse’ kenh iah othé:nen karihwástha’ tekaién:tahkwe nonkwarihwà:ke ne kén:tho, ne ki’ wa’karihón:ni’ tsi eh nahóntiere’.”

Helen Kanaieson Nolan tánon Kahentiióhstha’ (Roberta) Duhaime wa’otikè:tohte’ ronwanonhà:’a Tom Paul ronwanonhtonniòn:re’, kaio’tenhserà:ke tahrénheie’ 70 niiohserá:ke tsi náhe ne New Jersey nonkwá:ti.

Duhaime saiakehià:ra’ne tsi wa’ontkáhtho’ tekonreniésne nahò:ten tiorihowá:nen karihwanákere’ é:so iohserá:ke tsi náhe tsi iothró:ri’ tsi niká:ien Kanien’kehá:ka ratirista’kehró:non néne iah othé:nen tehatitshà:niskwe’. “Nia’té:kon tahotirákwa’se ne thí:ken ronnón:kwe’. Shahotiié:ra tsi iah othé:nen tehatitshà:nis.’ Orihwí:io ki’ wáhi othé:nen ratitshà:nis, tánon sénhak eh nahóntiere’,” wa’è:ron’.

“Kenòn:we’s tsi ísi’ nón:we niaháhe’ ne tsi nahò:ten ionkwatkáhthon’ ne Onkwehón:we raotirihwà:ke ne 1960 nitiohserò:tens. Sénha tsotonhnhé:ton’,” wa’è:ron’.   

Ken’ niiorihwà:’a wahaká:raton’ ne Gilbery néne iothró:ri’ tsi niió:re tsi ronate’shén:naien’ nothé:nen ahatirá:ko’ ne òn:wa kahwatsiratátie ken’ nithotiién:sa. Sahrehià:ra’ne tohkára niwenhniserá:ke shihshakorihonnién:ni’ nowén:na ne Kahnawà:ke Survival School (KSS) nonkwá:ti, tánon shaià:ta raterihwaiénstha’ wahèn:ron’ tsi iah entà:’on othé:nen ahaweientéhta’ne – tsi karista’kehró:non ratónhsere’. Gilbert wahohró:ri’ tsi kwah iah thahakwé:ni’.

“Wa’kì:ron’ tsi iah tha’tetenirihwakehnháhsere’. Tsherihwanón:ton’s ia’níha tóka’ karista’kehró:non satónhsere’,” wahrehià:ra’ne.

Shontontáhsawen’ tsi ronterihwaiénstha’ shonsaióhrhen’ne, sahohronkà:ten’ Gilbert wahèn:ron’, “Rake’níha wahèn:ron’ tsi iah thakkwé:ni’.”

Iah nè:’e tekén:ton’ tsi iah nonwén:ton eh thahá:iere’. Iahatahsónteren’ ki’ tánon ne ro’níha wahohró:ri’ roièn:’a ahaterihwaienstà:na’, ne tiorì:wa ne nahò:ten ahaweientéhta’ne. “É:ren í:seht ne kí:ken,” wahèn:ron’ ne ro’níha.

“Iah nì:’i teionkwate’shennaién:tahkwe’,” Gilbert wahèn:ron’. “Iah othé:nen tekaio’tenhseraién:tahkwe’, síro. Thò:ne ki’ eh iénhse’ Vietnam nonkwá:ti – ahsanèn:raieste’ ratihsotárne – tóka’ni aiesaio’ténhsera’.”

Ne ióntenonhne ne McGill Visual Arts Collection, Michelle McCabe, tontié:renhte’ wahonwawennà:ronke’ Noble, shaià:ta rarástha’, shahonwatirihón:ten’ ne ionaktakwèn:rare’ nahontià:taren’ tsi á:se shonnón:nis ne tioká:ion’ Chancellor Day Hall kanónhsote’ atenatà:ke nonkwá:ti Kanonno’kéha tsi nitkaierenhátie’.

“Óksak onkwaterièn:tara’ne tsi kéhrhahkwe’ akherihwakwénienste’ ne Kanien’kehá:ka ratirista’kehró:non skatne kí:ken kaio’ténhsera,” McCabe wa’è:ron’. Ionaktakwèn:rare’ wahatihní:non’ kaié:ri’ ní:kon karónnion’ ne Noble roráston’ ne 2023 nitiohserò:ten, sok tékeni shé:kon tontahá:ieste’. “Kwah tokèn:’en wahaon’wéskwen’ tsi kwah ákta ne Kahnawà:ke kaién:ton naiontkáhtho,” wa’è:ron’ McCabe. Kháre’ ó:nen, Noble ia’thorihwaién:ta’se aontahá:ieste’ akwé:kon ne karò:ron.   

“Wà:kehre’ tsi ì:’i ionkwaterihwaién:ni’ tsi ionkwanitiohkón:ni’, tsi onkwe’ta’kéha ateweiennónnia karò:ron í:ken, ne aiakhiiate’shén:non’ tánon aiakhihahónnien’, sénha tsi nonkwá:ti ne ontionkwe’ta’shòn:’a ronterihwaiénstha’ raotirihwà:ke, ne ki’ aón:ton’ ahatika’eniónnion’ kí:ken wateweiennonniánion’. Kwah tioiánere ne kí:ken kanenhrón:ni’, ne ki’ ne kenk nihá:ti ratirista’kehró:non ahatiká:raton’ tánon akoniónhnhéthon’ ne karónnion’, tánon ne kwah tokèn:’en tahontahsónteron ne kanakeráhsera.

Wá’tsik niá:re eh nón:we enkaién:take’ Kanatahkwèn:ke tsi niionkwarihò:ten ateweiennónnia kanónhsote’ nonkwá:ti ne tekahna’netáhkwen’ karónnion’.

[email protected]

Marcus Bankuti, Local Journalism Initiative Reporter

Translated by: Karonhí:io Delaronde