Rez Potter: Sewakwé:kon sewá:wen tewatierónnion

Ratiwennenhá:wi Kanien’kéha owennóskon raotitióhkwa tontié:renhte’ wahontià:taren’ ne Tetewatierónnion ne Kahnawà:ke nonkwá:ti, nek ne iá:ken wa’thatité:ni ne Harry Potter tsi nikakarò:ten, Rez Potter sahatinà:tonhkwe’, eh karátie ohnhontera’shòn:’a tsi ní:ioht ne kowá:nens onkwehón:we akohiatonhsera’shòn:’a.

“Thí:ken teiotkarahsonterákwen skátne Dobby, ne niá:we tsi ká:ris wahonwá:ion’, wahonwá:ion’ thí:ken onkwehón:we akohiatónhsera ne ki’ naón:ton’ ahahní:non’ Cadillac ne tsi ratitsenhaientáhkhwa nonkwá:ti,” wa’è:ron’ ne Samantha Karonhí:io Simon, akaónha wahonwatiié:nawa’se tsi énska teiotkarahsonterákwen Kanien’kéha wa’ewennón:tahkwe’ ne tewatierónnion aorihwà:ke. Simon wa’è:ron’ tsi iaweronhátien tsi eh ié:ienskwe nahonwatiié:nawa’se ne akotióhkwa, nek ostón:ha iakotshé:iaronhkwe ne tsi kaswen’karáhere taié:ta’ne’.

Simon wa’tierihwáthe’te’ tsi wa’tiewennaté:ni’ énska teiotkarahsonterákwen ne Harry Potter and the Goblet of Fire Kanien’kéha saiewennón:tahkwe’ skátne raotiienawa’séhtshera ne akotióhkwa tánon ne shakotirihonnién:ni, tánon wa’é:ieste’ tohkára nikaswà:take tsi nonkwá:ti ne teiontieronniónhkhwa kahiatónnion. 
“É:so tsi io’nikonhrà:rekt naiontkáhtho’ onkwanakeráhsera tsi wa’thatiié:na nó:ia nonkwakerahsera’shòn:’a ne sha’akwaià:ta ne ki’ aó:wen naiakwatá:ti’ nonkwawén:na,” wa’è:ron’ Simon. “Niionehrákwaht naiontkáhtho’ tsi ó:nen ki’ iohahí:io nonsaionkwaiera’tonhátie, ne ki’ wáhi ne aiakwaweientéhta’ne nonkwawén:na tánon eh nón:we iaiakwathón:rohwe’.”
Tió:konte ne teiohserakehátie, otióhkwase ronteweiénstha rotiientátie ne Ratiwennenhá:wi Kanien’kéha owennóskon raotitióhkwa, tánon tsi nitiaká:wen ne Kawisaiénhne Albany, iakorihonnién:ni iontaterihwawà:se nen’ nè:’e tánon ionteweienstáhkhwa iakón:nis ne tsi iontewennaweienstáhkhwa nonkwá:ti, kí:ken otióhkwa nà:’a iahatì:reke’ nahontià:taren’ ne tewatierónnion.

“Iah ónhka tetiakhiianonhtón:ni neh naióntiere’. Tohkára nihá:ti ne ronteweiénstha wahshakotihretsá:ron’ kentiohkwakwé:kon nahontià:taren’,” wa’è:ron’ Albany. Wa’khehró:ri’ ki’ tsi tóka’ iákwehre ken’ naiakwátiere’, entà:’on kentiohkwakwé:kon enhontià:taren’, tánon tó:kenske akwé:kon nè:’e ronnéhrhahkwe.”

Karihwakwe’ní:io wa’akoió’ten’ ne tewatieronniòn:ke ne Albany: tekarihwaierónnion.

“Entà:’on nahò:tenk tha’atión:ni’ naón:ton ne aiakwatkon’serón:ni’, thò:ne ki’ tekanakará:ke ionhrhiohkawinéhtha wa’ákwatste’,” wa’è:ron’ Albany, wa’tierihwáthe’te’ tsi wahatiniión:ton’ nia’té:kon tsi ní:ioht ne ionta’ennarástha anòn:warore tho ionhrhiohkawinéhtha ahseriie’tà:ke tánon è:neken tsi thonatenontsístate ne tehontierónnions wa’akwa’awihtánion’. “Thok ki’ nà:tiere’, ohna’kénhson takaterakén:rie’ tánon wa’khenéntshine’.”

Ne Albany akorihwà:ke, é:so tsi wate’shenní:io ne Kanien’kéha owén:nases aieweientéhta’ne’ ne aiontià:taren’ kí:ken tewatierónnion skátne Kahnawa’kehró:non, tsi tehontewennatihánion ne tekaná:take.

Ne ó:ni wa’onthró:ri’ tsi ó:nen ronatià:tare ne thí:ken tewatierónnion ne Ratiwennenhá:wi Kanien’keha owennóskon raotitióhkwa, ó:nen ki’ skarihontienónties ne aonsonterihwahtén:ti’ ne owén:nakon tehontierónnions ne Kanehsatà:ke nonkwá:ti.

“Ionkwaién:tahkwe thí:ken wahón:nise tsi náhe, kwah í:kehre ohén:ton sha’kennákerate’,” wa’è:ron’ Albany, wa’tierihwáthe’te’ tsi kak tsi ní:ions ne 1990 nitiohserò:tens, Owén:na Enhnísera teiontierónnions wahonterihwahténtia’te ne kanakeráhsera, tánon nó:ia tkanatakè:ron nákte’ nithonenónhseron enthón:ne’ enhonterò:roke’.

“Aiá:wens ki’ wáhi eniako’nikonhrà:reke’ nó:ia otióhkwa tahón:ne, entà:’on é:ren eniákwehte’ tsi iakwatenaktiiostáhkhwa tóka’ iákwehre aiakwaweientéhta’ne’ aiakwatá:ti’,” wa’è:ron’ Albany.

Karihohétstha Cupples, Dumbledore tánon ne tewani’nekarà:was atè:sera wa’tiontierónnionhwe, wa’onthró:ri’ tsi tho nón:we naonhà:’a taienòn:we’ne’ ne tsi niwatieronniónhtsheres ne ki’ ne sha’tkà:ri’ne’ ne Goblet of Fire.

“Iah tha’teiotonhontsohòn:ne eh naiawèn:’en’, nek tsi wa’karihón:ni’ kowá:nen wahatisté:riste’ ne kanèn:ra,” wa’è:ron’ Cupples.

Cupples eh ieia’tarátie ne tsi nihá:ti iehotihré:kon ne Ratiwenennhá:wi Kanien’kéha owennóskon raotitióhkwa ne ahontià:taren’ ne Tetewatierónnion, tsi thí:ken tewatierónnion ronaterohrokhòn:ne ne otiohkwa’kénha, nek tsi iah kwah tehonatià:tare.

“Niion’wé:sen taieierontá:ren’ tsi niiakorihò:ten tánon ok naié:iere’ aionteweiennón:ni’ skátne ne onkwawén:na néne ionkwaweientehta’onhátie,” wa’è:ron’ Cupples. “Kwah akwé:kon thia’teionkwahnhíhseronskwe tsi nè:’e tontié:renhte’ tsi kaswen’karáhere wa’tiakwá:ta’ne’, nek tsi nè:’e skaia’takwe’ní:io tsi akwé:kon wa’akwate’nikonhró:ri’ tánon wa’tiakwataterà:se’se’.

[email protected]

Fern Marmont, Local Journalism Initiative Reporter

Translated by: Karonhí:io Delaronde