É:so ioterihwahténtion Tsi Niionkwarihò:ten Niwenhni’tò:ten

Ó:nen tontáhsawen’ Tsi Niionkwarihò:ten Niwenhni’tò:ten, wate’shén:naien’ aiakohsón:rie’ tánon’ aierihó:wanahte’ tsi niiawèn:’en tánon’ tsi niiorihò:ten ne Kahnawà:ke. Thia’tewenhniserá:ke thé:nen’k ronaterihwahtentià:ton Kanien’kehá:ka Onkwawén:na’ Raotitióhkwa’ (KOR). Eh tho karátie’ kanèn:raien’ aiontéweienste’ oh ní:tsi io’nhehsen’tónnion aie’whahsón:ni’ tánon’ oh ní:tsi io’nhehsen’tónnion aiontia’tawi’tsherón:ni’, oh ní:tsi iontien’kwarón:nis taienónniahkwe’ tánon’ oh ní:tsi ohontsa’kéhkha’ karenna’shòn:’a aionterennó:ten’.

Né: ò:ni’ thikarihwaténion tsi ní:ioht ne K1037 Wáhta owerà:ke tehatihthà:rane’ Onerahtókha 16 shenská:rake’ - 9 a.m tsi niió:re 1 p.m enwaterihwahtén:ti’ nòn:wa iohserá:te’. Né: aó:wen ahonwatiién:tere’ne’ tsi nihá:ti thotí:ien’s Kanien’kéha ronhrónkha’ - nok 2025 Niiohserò:ten Rotinonhsionni’kéha Watkenníson’ tsi nenwatenhni’tò:kten’ waterihwahtentiónhe’.

Ken’ niió:re, Ohontsakéhte’ Montour néne KOR tsi niionkwarihò:ten thoniarotáhrhon wahèn:ron’ kwah tokèn:’en ronon’wéskwani onkwehshòn:’a akwé:kon tsi nahò:ten’ ioterihwahténtion.

“Kaní:io’k enkara’nentákton aiontià:taren’ nahò:ten’ waterihwahtentiónhe’, óksa›k tentkanenhrà:ra’ne’. Sénha ki’ é:so ietsonkwawenhtá:ton aiontià:taren’ ase’kén tsi niió:re tsi ón:kwe teiakotonhontsó:ni,” wahèn:ron’ Montour. 
“Tóka’ othé:nen tisewa’nikonhratihénthos, kwahretsá:ron ki’ aiesewatià:taren’ aiesewate’nién:ten’.”

Thia’tehia’khserá:ke ne Soséhne, tsi niwenhnì:tes ne Onerahtókha, éntie’ ní:kare’ tsi niió:re énska niiohwistà:’e, Kahnawà:ke Tourism ienhonwatiia’ténhawe’ onkwehshòn:’a ahonwatina’tón:hahse’ kanónhskon Kanien’kehá:ka Onkwawén:na’ Raotitióhkwa’. Iah teioká:raien’ tánon’ thikawenní:io ónhka enwá:ton’ eniontià:taren’.

Raona’arà:ke ne Kanien’kehá:ka Onkwawén:na’ Raotitióhkwa’ enwá:ton’ ieniontatshennínion’te’.

“Iakwate’niéntha’ aiakhihró:ri tsi ní:kon eniakwakwé:ni’ ne onkwaná:ta’ aorihwà:ke tánon’ tsi niionkwaia’tawénhseron tsi nikarì:wes ne thí:ken énska enkahwistà:’eke’,” wa’ì:ron’ Bronwyn Johns. Né:ne onkwe’tà:ke ronwatiio’ténhse’ ne Kahnawà:ke Welcome Center nonkwá:ti.

Eh tho karátie’ enhonwatihró:ri’ tsi nihotiia’tawénhseron ne Tiohrhen’shá:ka kanontiióhsera’ tánon’ O’serón:ni kanontiióhsera’, tsi ní:ioht tsi wa’kanataién:ta’ne’ ne Kahnawà:ke tsi nòn:wa ní:ioht tsi í:we’, nok Sha’thonwatinatáhnhake’ Kanehsatà:ke.

Johns wa’ì:ron’ shontenhniseratié:renhte’ wahonterihwahténtia’te’ néne kanónhskon ronwatina’tón:ni, tehniiáhse néne Kahnawà:ke Shakotiia’takéhnhas Community Services rotiió’te’ wahnikwátho’ - tseià:ta Kahnawa’kehró:non tánon’ tseià:ta iah – nok ò:ni’ skahwatsí:ra India nithoné:non tánon’ tohkára nihá:ti néne Tiohtià:ke nonkwá:ti shakotina’tonnì:re’s rotiió’te’.

“Í:kehre’ kwah tokèn:’en ion’wé:sen aiontkáhtho’ é:so rá:ti nia’tehatiia’to’tèn:shon ronahkwíhsron ne kèn:tho aontahatiweientehtà:sera’. Né: ki’ nahò:ten’ kwah tokèn:’en entkaia’takehnhatsherénhawe’ ne skén:nen aonsakénhake’ tsi na’tétion,” wa’ì:ron’ Johns.

Nakorihwà:ke, kí:ken iehonwatiia’ténhas ahonwatina’tón:hahse’ ne

Tsi Niionkwarihò:ten Niwenhni’tò:ten aorihwà:ke ió:wis Kahnawà:ke akarihowanáhton tsi niiorihò:ten tánon’ tsi niiawèn:’en.

“É:so iá:kon iah teiakoterièn:tare’ oh niionkwaia’tawénhseron. Iah ki’ kwah nè:’e tehonwatirihonnién:ni tsi ionterihwaienstahkhwaniónhkhwa’ ákte’ nón:we,” wa’ì:ron’ Johns. “Ken’ ki’ kaná:takon, orihwí:io se’ ionkwaió’te’ aiakhirihónnien’ néne tó:kenske tsi niiawèn:’en, nek tsi ákte’ nón:we, iah tho tekarátie’ ne raoná:wen wateweienstáhkwen.”

Montour wahèn:ron’ é:so tsi sha’tékena’ tsi nihatiiéhrha’ ahonwatirihónnien’ tsi niiawèn:’en tánon’ tsi niiorihò:ten ne Kahnawà:ke. Tánon’ karihwahnirá:tha’ tsi sha’tékena’ tsi niió:re tsi é:so rá:ti ronon’wéskwani Tsi Niionkwarihò:ten Niwenhni’tò:ten.

“Ó:nen wísk niiohserá:ke shitia’tarátie’s ne Tsi Niionkwarihò:ten Niwenhni’tò:ten tánon’ thia’teiohserá:ke iotehiahròn:’on. Tsi nì:’i ken’ nikahá:wi niió:nakte’ aiakwatonhnhà:ren’ ónhka nì:’i tánon’ tsi nahò:ten’ ionkwarihwaio’tátie’ ne tsi niiakwawennò:ten aorihwà:ke tánon’ ne tsi niionkwarihò:ten aorihwà:ke. Wate’shenní:io ni’ nen’ nè:’e ne kanatakonhró:non ahontia’tarò:roke’ tánon’ skátne ahatiweientéhta’ne’.”

Orihwakwé:kon tsi nahò:ten’ KOR ronterihwahtentia’tà:ne’ ne Tsi Niionkwarihò:ten Niwenhni’tò:ten karihwarónnion raotira’wistà:ke Facebook tánon’ raona’arà:ke nón:we.

[email protected]

Olivier Cadotte, Na’kòn:ke Rontehnhohanónhnha’

Sahawisó:ko’ Arquette, Tehowennanetáhkwen Na’kòn:ke Rontehnhohanónhnha’